الله يجازيك يا عم عبد الناصر | قصيدة الشاعر المصري عبد الرحمن الابنودي

نشر وتحرير: في Monday, November 23, 2009, 22:07
هذا المقال نشر في قسم: حكايات | ويحتوي على: 26 تعليقات فقط .

عبد الرحمن الابنودي

عبد الرحمن الابنودي

قصيدة الشاعر المصري عبد الرحمن الابنودي

الله يجازيك يا عم عبد الناصر

لعل هذه القصيدة للشاعر المصري الكبير عبد الرحمن الابنودي تعتبر اكبر معبر عن الاحداث التي رافقت مباراة مصر والجزائر وما تلاها من احداث

وسنترك القصيدة  بدون تعليق او مقدمة فكلماتها تصف الحالة بشكل واضح !!

الله يجازيك يا عم عبد الناصر
الليل مليّل
والألم عاصر
لسه اللى بيبيع أمته كسبان
وكل يوم
أطلع أنا الخاسر
=========

أما أنت خميت مصر دى خمة
يوم ما ناديت بالعشق للأمة
ورطتنا نعشق خريطة عبيطة
وبشر ما نعرفهاش
وبلاد.. ما بنزورهاش
إلا.. فواعلية وبنايين وسواقين
وخدامين.. وطباخين.. وكناسين
بلاد أسافرها سعيد
أرجع حزين
حبيتها زى ما قلت لي.. وأكتر
ع الأجنبى ما استكترتش.. عليا تستكتر
ع الأجنبى ما اتنقورتْش عليا تتنقور.
تطمع فى دمعي
وف تعاسة راتبي.
مُلهم أنا.. وأعمل غبى
وأدى الألم يا عم عبد الناصر
زاحف وبيحاصر
وآدى الجميع خاسر
وآدى فجر أمتنا الجميل مغلوب
وآدى انتحار الأمة بالمقلوب
وأنا… غريب الدار..
لابسنى توب العار
ساكن فى وطنى بالإيجار
=========

قاعد أنا ع الجسر فى القيَّالة
من قلب اللهيب مِنشالة
وقلبى.. ساقية حزن سَيالة
باغنى..
ما أعرف مغنى وألاّ عديد
زى افتكار الميتين.. فى العيد.
باعانى وحدانى
شياطينى لابسانى
والأمة قدامى.. مفارقانى
يا رب…
ما تحببنى فى الناس الملاح تانى
يا رب
ما ترجعنى أعشق
ضحكة إخوانى
يا رب
كرهنى فى أوطانى
=========

ما أخيبك أمَّة
ما أتعسك أمة
لا عقل… ولا همة…
لا مصدقه فعلك
ولا تحفظى كلمة.
أمة.. تدور وتلف..
تقيلة.. مش حتخف
حماسية… وحماسها
بكتيرُه ساعة.. يجف.
أمة بتتخابِط
أمة بتتعابط
أمة ومالهاش
لا زابط ولا رابط
ولا كبير عيلة
ولا قرابةْ دم
وفكرة وهمية
ما تورث إلاّ الهمّ…
ما تحل عنى يا عم..
إحنا ورثنا كلام
إحنا تاريخنا كلام
علشان كده لما تقول..
على طول أقول:
وبكام؟؟
ما هو حب؟؟ دبرنى
وتاريخ؟.. فكرنى
وطريق؟.. نورنى
ومصير؟.. بصرنى
ده انا بقيت عربى
من قبل ما ألقى
اللى يمصرني.
أنا انتمائى لأمتى…
ممسخرنى.
محسوبة فى الأحزان على
فى الفرح تنكرنى
ياللى إنتى لا أمة
ولا أنتى أم..
فيه أم
ما تعرفش ساعة الألم..
تضم؟..
=========

قد ما ننورها
هيه مضلمة
قد ما نعلمها..
مش متعلمة.
كل ليلة بايتة مظلومة
وهيه الظالمة!!
آخرة السكك الوعار
مجد.. متلطخ.. بعار.
قد ما نحجمها…
تفلت م الإطار!!
السلاح من صنع بره
والكلام من صنع بره
المآكل
الملابس
والهوا البارد فى بيتى..
صنع بره.
لا نسجْت الهدمة..
لا زرعْت.. ولا اكتفيت
شفتها.. جريت اشتريت.
جلاّبيتى.. عمامتى.. سجادتى
وحواديت الصغار
والحلاوة: حلوة.. مرة
شغل بره.
إيه يهم
إن مت من أجل البشر
ولا سبت الديب يصرَّخ
واتغابيت؟…
أو نسيتها؟ أو اتناسيت؟؟..
الشهادة مجانية…
والبطولات…
نفحات استعراضية
والليل مليّل
والألم… عاصر
لسه اللى بيبيع أمته
كسبان..
وكل يوم..
أطلع أنا الخاسر…
الله يجازيك
يا عم عبد الناصر

==============================

معلومات عن الشاعر عبد الرحمن الابنودي

ولد عبد الرحمن الابنودي عام 1938 في قرية ابنود بمحافظة قنا لصعيد مصر
و الشاعر عبد الرحمن الأبنودي متزوج من المذيعة المصرية نهال كمال وله منها إبنتان آية و نور .

اشهر اعمال عبد الرحمن الابنودي وكتبه

من أشهر أعماله السيرة الهلالية التي جمعها من شعراء الصعيد ، ويستعد الفنان محمد منير لاصدار البوم اغاني من السيرة الهلالية  بالتعاون مع الشاعر عبد الرحمن الابنودي .
ومن أشهر كتبه كتاب ” أيامي الحلوة  ” وهو يمثابة سيرة ذاتية وقصص واحداث تؤرخ لحياة عبدالرحمن الابنودي وصعيد مصر عامة.

دواوين عبد الرحمن الابنودي الشعرية :

المشروع والممنوع
الموت على الأسفلت
جوابات حراجي القط
الأرض والعيال
الكتابة
صمت الجرس
الزحمة

اشهر الاغاني التي كتب كلماتها عبد الرحمن الابنودي هي :

عبد الحليم حافظ :عدى النهار ، أحلف بسماها وبترابها، إبنك يقول لك يا بطل، أنا كل ما أقول التوبة، الهوى هوايا،أحضان الحبايب، وغيرها.
محمد رشدي: تحت الشجر يا وهيبة ، عدوية ، وغيرهما .
فايزة أحمد: يمّا يا هوايا يمّا، مال علي مال.
نجاة الصغيرة: عيون القلب .
شادية: آه يا اسمراني اللون .
صباح: ساعات ساعات .
وردة الجزائرية: طبعًا أحباب ، قبل النهاردة.
ماجدة الرومي: جايي من بيروت، بهواكي يا مصر
محمد منير: شوكولاتة، كل الحاجات بتفكرني، من حبك مش بريء، برة الشبابيك، الليلة ديا، يونس وعزيزة.

اخبار ومواضيع ذات صلة:

Sponsored links


26 التعليقات في “الله يجازيك يا عم عبد الناصر | قصيدة الشاعر المصري عبد الرحمن الابنودي”

  1. SABAH
    2014.07.18 10:14

    …Algeria  is the capital of Palestine  

  2. بلدى حبيبتى
    2013.09.06 00:43

     العيب مش فى عبد الناصر  بلعكس هو الى عملكم قيمه بين البلاد العيب فيكم انتوا يا شعب  وفى البلاد التانيه 

  3. هشام عثمان
    2013.04.01 22:03

    انا مش شايف غير هجوم على العرب و مش شايف اى معارضه للطاغوت عبد الناصىر المنكوس

  4. محمد البدري
    2010.11.14 04:13

    أخيرا فاق الابنودي من الحالة اللي كان فيها. شوف بقي يا عم ابنودي، المرة الجاية تشرب صنف كويس وبلاش الانواع الرخيصة اللي في محل الخواجة يني.

  5. اشرف-a.f
    2010.10.05 12:43

    ليس لهذا الكلام علاقة بالابنودي ، هذه خواطر وليست شعرا . ولا علاقة لها بالابنودي . لايمكن له ان يتدنى الى هذا المستوى الردئ ولم اراه ينقلب بل وينتكس الى هذا الشعور القبيح بوطنه وبالحقيقة التي تدنت بالبلد الى هذه الحال من يوم ان باعت مصر نفسها يوم كامب ديفيد وسلمت ارادتها وشعبها العظيم الى امريكا والصهاينة وفئة من المنتفعين . عبد الناصر مات وهو يجاهد ويبني . واعد جيشه للانتصار ، الذي حدث في ظرف 3 سنوات فقط ، واستردت مصر كرامتها . التي باعها السادات واعقابه في سوق النخاسة . 

  6. مدحت المصرى
    2010.09.30 19:03

    والله لا اذكر بلد ا لها عزه او كرامه الا وكانت مصر خلف كل اصاله كانت لكم اذا انتم اصحاب المقامات يا حاقدى مصر لان مصر ظلت وستظل هى الاب والروح الذى يدافع عن حقوق العرب والله هذا ما كلامى انا ولكن كلام التاريخ راجعوا تاريخكوا يا جزائر ومغرب و قطر يا بلاد الامريكان وقواعدها العسكريه

  7. ليله
    2010.03.31 16:32

    تسلم استاذي الابنودي

  8. m
    2010.02.28 04:23

    ya khasara … its too sad we arabs reached to this point of being low in everything .. we only talk about I am egyptian, I am Syrian, I am khaliji or jazaeeri or whatever …. but we forgot we all being arabs … its too sad and we should cry until we clean our hearts … I don’t believe that we have all this much hate inside our hearts

  9. كاااااارثة عربية شرق اوسطيه
    2009.12.16 09:34

    انا بوجه كلامي للعرب والدول اللي تنسب للعروبة لا حرب بدون مصر ولا حتي سلام انا بحذركم ان بأفعالكم وكلامكم علي المصريين بهذا السفه سوف تخسرون الكثير ولا تعلمون هذا الآن وليس صداه الآن يمكن تشارك انت وعمرك 20 في حمله عداء لمصر يتولد منها جيل من المصريين بنفس سنك واصغر يعرفون حقيقة عداءكم للبلد وكل ما هو مصري ستفقدون عروق اصيله في مناصرة القضية العربية ستفقدون قلوب جياشة بالعاطفة وتثور وتفور من أجل العرب والعروبة واذا كنتم مؤمنين بطبيعة ومصداقية الشعب المصري وغير راضيين عن السياسة او الحكومة احب اذكركم انكم هنا وهنا تصولون وتجولون في المنتديات والأنترنت تتحدثون فقط مع الشعب لا الحكومة وتنقلون عدائكم للشعب لا الحكومة وكان اجدر بكم مناصرة الشعب واحترامه وحثه علي الصبر وتعديل الأوضاع التي تفيد البلد وتفيد العرب لو كان بداخلكم اي شعور صادق بحب او كره يجب ان ينتقل بمنتهي الشفافية حتي نحدد ماذا سنفعل إذن سنكون اعداء ام أشقاء لكن هذه جريمة تجنون بها علي انفسكم ولا تحاولون التنصل من مصر والمصريين لأننا بوابه أفريقيا وبوابه الشرق كله بشهادة التاريخ والجغرافيا اناشدكم لا تخسرونا فينا المسلمين والمسيحيين اهلنا اهل الكتاب نؤمن بالله ورسله ونتمني الشهادة في سبيل الله والوطن وكان الوطن بداخلنا من المحيط للخليج فلا تختزلون القضية في قلوبنا ولا تحرقون كل ما هو أخضر لحساب كل ما هو يابس ولا تنسوا دور مصر في كل القضايا العربية ولا تخدعوا انفسكم وتحاولوا تغيير الحقائق لإثبات نصر زائف لكم علي حساب اعرق بلاد الأرض افتخروا اننا ننتسب للعرب والعروبه ولا تمحقوا وتسحقوا قوة ضاربة وليست ناعمة فقد وإن لم تصدقوني فصدقوا الصادق الأمين محمد عليه أفضل الصلاة والتسليم أننا خير أجناد الأرض وهذا ليس بمن ولا غرور ولكن تنويه اننا بداخلنا دماء ذكيه تروي ارض العرب والمسلمين.

  10. معاذ
    2009.11.25 21:35

    ينصر دينك يعم ابنودى انته جبت من الاخر والله وريحت اعصابنا وعرفتنا اللى فيها بس لازم نعرف ان احنا اتورطنا يعم ابنودى بسبب عبد الناصر كان عندة حلم شخصى انو يبقى زعيم للامة العربيه وادينا بندفع التمن غالى

  11. جزايري
    2009.11.24 21:33

    نحن نرى في الجزائر أن السادات و مبارك أستهلكو كل القوة الناعمة المصرية بشهادة هيكل و زجوا بكم في تطبيع أسقطكم من أم كلثوم و حليم و طه حسين ألأى هيفاء و فيفي عبده و تامر حسني
    أستفيقو و لا تكونو مغفلين

  12. مصريه جداااااااااا
    2009.11.24 17:27

    الجزائر تاريخها اسود طول عمرها

  13. مصريه جداااااااااا
    2009.11.24 17:27

    اقولك انا معلومة اسرائيل مش بتتعامل الا مع البلاد القوية والبلد الهفأ اللى زى بلدك تكتفى انها تعملكو يويو فى ايديها اكتمى بقى

  14. جزايري
    2009.11.24 14:34

    الجزائر لها وقفات مشهودة مع القضية الفلسطينية

    تم أعلان الدولة الفلسطينية في الجزائر
    ألقى محمود درويش قصيدته الشهيرة مديح الظل العالي بالجزائر
    أول من مكن أبو عمار من مصافحة زعماء عدم الأنحياز كان بومدين رحمه الله و ما في دلك من أعتراف ضمني
    أول خطاب ألقاه أبو عمار أمام الأمم المتجدة كان بجهد من الدبلوماسية الجزائرية لما كانت الجزائر ترأس الجلسة

    تاريخ ناصع و لا ينقص من جهد الأخرين شيءا

  15. سمية الجزائرية
    2009.11.24 13:50

    يا مصرية جداااا الجزائر هي الاولى صاحبة الشعر نحن مع غزة ضالمة او مضلومة ولم يطأ راسها امام اسرائيل ولم تصافح يوما الاسرئيل وانتو عاملين ايه معاهم هاد المرة كان عندكم اسرائيلي يا اسرائليين

  16. عامر منيب
    2009.11.24 13:36

    بص يا بيكهام اني ليا صديق من غزه ومنضم لحركه اسلاميه احيانا بنتقابل علي الميل ونتكلم … لو تعرف كم يعضق هذا الرجل مصر واهلها … لو تدرك كم يحب الفلسطينين مصر ويقدرون لها صبرها علي الاقتتال الفلسطيني الفلسطيني لادركت ان من يخطي في مصر لا يعلم شيئا عن تاريخ العرب فهو فرنسي الاصل صهيوني الفكر

  17. بيكهام _ مصر
    2009.11.24 13:25

    من كام ساعة كنت قاعد مع شباب فلسطينيين:
    قولتلهم ايه رايكم ف اللى بيحصل ردوا عليا بالاتى
    قالولى هما مش عارفين الجزائريين بيجيبوا سيرة فلسطين فى اللى حصل ليه
    وقالولى ان اللى ليه حق يتكلم عن عمل ايه ومعملش ايه للفلسطينين هم سوريا ومصر
    لبنان زى ما احنا عارفين ف البطاطا وسوريا مصر اكبر دولتين متشاركين فى المسؤلية
    واحد منهم قالى انه سافر الجزائر قالى باللفظ كده اوسخ شعب والمغربيين احسن منهم
    بكتير .
    قال كمان ان اللى حصل ده مقصود من الجزائريين وفيه ناس كبيرة وراهم وهما مش بيحبوا مصر خالص بالرغم من ان مصر هى اللى عملتهم . الحدق يفهم

    قالى هما عارفين ان الشعب المصرى لو يطول يفتح المعابر حيفتحها بس الحكومة اللى ماسكة الموضوع والشعب ملهوش علاقة بيها ودى سياسة ولازم نستمر فيها كده شد وجذب وربنا كبير

    بجد يعنى مثلا قاعدين بتناقش ساعة ونص على اقل تقدير قومت من المناقشة وانا مبسوط انى لقيت ناس فاهمة ومقدرة يعنى ايه الشعب المصرى يعنى ايه مصر وصدقونى مش محتاج غير الشهادة دى ناس بتفهم بجد ولما تحاورنا وتناقشنا مع بعض كانت مناقشة حضارية واتكلمنا بصراحة ف كل حاجة . الخلاصة الشعب الجزائرى ملهوش حاكم ممشياه شوية ميليشيات عسكرية واحنا كلنا شوفناهم ف السودان . مش محتاج لاى واحد جزائرى يقولى او يفهمنى حاجة الا لو كان بيتكلم بالمنطق من غير قلة ادب وشتيمة وبحوار راقى ومتحضر نسمع بعض
    ؟ ممكن ؟

  18. عامر منيب
    2009.11.24 11:22

    مفيش تاني حد من مصر هيفكر في عروبه وقوميه وكلام اهبل تمسكنا بيه … فلسطين قدامكم اهي مفتوحه من لبنان وسوريا اللي مش عاجبه الاسرائيلين يروح ويحارب وملهوش دعوه بمصر كفايه لحد كده … بس وانتو رايحين اوعي حد يعرف البربريين يحسن تخسروا الحرب قبل متبداوها

  19. ريان - قطر
    2009.11.24 05:39

    والله يالأبنودي المشكله مش في عبد الناصر الله يرحمه الي عمل لكم قيمه بين الأمم… المشكله في شلة الصعاليك الي جو بعده و نهبو البلد و دمرو طموحات الشعب بحيث أصبح هم المواطن الأول توفير الرغيف لعياله و باعو الامه مقابل الأخضر…
    أذا صح أنك وطني أفضحهم بدل ما تتستر عليهم.
    العمر ما بقه في شيئ عشان أداريهم…

  20. مصريه جداااااااااا
    2009.11.24 03:33

    مثلما اسرائيل استخدمت الجزائر فى اشعال الفتن وتحثها على اندلاع الحروب فابشرى يا جزائر انكى اول من تدوس عليه اسرائيل

  21. مصريه جداااااااااا
    2009.11.24 03:32

    حقيقى الحلم العربى اكبر وهم

  22. جزايري
    2009.11.24 01:04

    مات المشروع القومي في السبعينات فأنفردت أسرائيل بمصر و أمريكا بالخليج و انخرط الباقي في حروب أهلية أو عربية عربية

    الله يرحم بومدين و ناصر

  23. أمين
    2009.11.24 00:38

    حبيبنا وعمتا الكبير الأبنودى نبض مصر شاعر صادق الأحاسيس مفيش كلام ينقال بعد اللى قاله وده حالنا وموالنا والله  حاجة تبكينا على أحوالنا وتشمت فينا غزالنا خلونا نكفر بالقومية العربية مهلبية على طعمية سوق وصاحبه غايب دول لا أهل ولا حبايب وتدفع كام على مائدة اللئام وسلام يا صاحبى

  24. عربي اصيل
    2009.11.24 00:29

    العيب مش في جمال ياعم الابنودي العيب في الشعوب الاخري اما شعب مصر اصيل

  25. مغاربي
    2009.11.24 00:27

    صح بعد الزعيم عبد الناصر ما بقالكمش الا الخيبة ينصر دينك يا ابنودي

  26. الفنك الليبي
    2009.11.23 22:49

    الله كبير يا أبنودي


    

أكتب تعليقك