الهروب من بر مصر

الهروب من بر مصر

مصريات

و لما ضاق الأخوة المصريين بوطنهم ابتكروا الطرق العديدة للخلعان من بر مصر بأسهل طريقة التي رغم تعددها يمكن أن نوجز بعضها لعلها تكون المرشد لمن يريدون أن يحصلوا أخواتهم في النضال و الكفاح و الخلعان .

الطريقة الاولى : هتحتاج بس إنك تشد الرحال على الغردقة أو شرم و هناك تستطيع أن تجد أي أنثى في سن الضياع أو صلاحياتها قاربت على الانتهاء و توسعها عبارات الغزل و الحب و الولع و لأنها ساذجة و مش عارفة هتقول لنفسها ده حفيد الفراعنة يعني لسه جامد و بخيره ، و ما تعرف إن اكلنا المسرطن و مياهنا الملوثة خلت أعتى الشباب يبقى مخوخ من جواه ستسعى جاهدة إنها تتجوزك و تشدك على بلادها و تاخد هناك الجنسية و تاخد كام ألف يورو و تضربهم في كام جنيه مصري و تعيش حياتك برنس دون أن تكلف نفسك قرش صاغ .

الطريقة الثانية : إنك تروح تقدم على أي منحة دراسية في أي بلد نضيف و هناك تخلع من المنحة و المحنة اللي انت فيها و تشوف اي شغلانة و برضه العائد منها هيبقى أكتر من العائد من المنحة و لا مذاكرة بقى و لا وجع دماغ ده غير إنهم هيكتشفوا  إنك فاشل دراسيا و ان المناهج اللي بتدرسها انت في مصر هي الحاجة الوحيدة اللي باقية من العصر الجاهلي .

الطريقة الثالثة : انك يا سيدنا تروح على روض الفرج و تأجر مركب في النيل و تقول لصاحبها إنك عاوز تطلع بيها لوحدك و تدفع أي  مبلغ يقولك عليه و بعدها بكام كيلو هيقابلك واحد صاحبك نفس ظروفك تشحنه معاك على المركب و تاخد خريطة صغيرة يبقى فيها الطريق و تطلع على أول البحر المتوسط من ناحية المنيل و أنت راجع و منه الى ليبيا ثم ايطاليا و قبل ما توصل بكام كيلو تقوم ضارب نفسك بأي مطوة انت و صاحبك و تروح هناك تقولهم احنا فلسطنيين هالاقي الناس مرحبين بيك بس العقبة اللي هتقف قدامك أن اكيد صاحب المبلغ هيبلغ عنك الانتربول اللي في روض الفرج الايطالية بالإضافة إلى أن الرحلة بهذه الطريقة ستستغرق أكثر من 4000 يوم .

الطريقة الرابعة : تروح لأي منظمة حقوق انسان أو حقوق قطط و تقولهم يا جماعة انا مضطهد في بلدي ساعتها هتلاقي ألف منظمة دولية بتقولك سيبك من بلدك و تعالى يا حبيبي عيش عندنا في بلدنا اللي مفيش فيها اضطهاد و قول إنك مضطهد لاي سبب ان شاء الله تقول ان امي بتضطهدني و بتطبخ كوسة و ان مش بحبها و عندها من الممكن أن تمسك منصب كبير في منظمة مناهضي الكوسة في الشرق الأوسط .

الطريقة الخامسة :تذهب إلى السفارة الصومالية في مصر و تطلب عقد عمل قرصان في السواحل الصومالية وقتها الأخوة القراصنة هيرحبوا بيك جدا و مفيش واسطة في التعيين هناك ما تقلقش بس هيشترطوا عليك أشياء مهمة أولها انك تشتري جلدة سودا تحطها على عينيك و ثانيها اذا كنت مش اسود تاخد معاك ورنيش اسود و تدهن نفسك بيه اثناء فترات العمل الرسمية ، ثالثا اثناء الشغل ممنوع انك تضحك علشان سنانك البيضا ما ترشدش الاعداء على مكان اخواتك القراصنة و انت في البحر ليلا

الهامي سمير

اخبار ومواضيع ذات صلة:

خمس طرق فقرية للخروج من بر مصر

3 comments
  1. محمد 17/09/2016 02:43 -

    ياعني لو عملت اي حاجة من دول متأكد اني هسافر و لا بتهزر

  2. مصراوي حتي النخاع 25/11/2009 21:39 -

    …..ههههههههههههههه

  3. حسام ابو فارس 10/08/2009 13:55 -

    انتى فقرى وشكللك عايز تروح الصومال

أضف تعليقاً