والنبي يا شيخ تنقطنا بسكاتك | علاء صادق و التليفزيون المصري

استقالة علاء صادق من مودرن سبورت

استقالة علاء صادق من مودرن سبورت

مصريات

السيد البابلي

كان عندي شك ، وشك كبير قوي ان التليفزيون المصري تعاقد فعلاً مع المعلق الرياضي علاء صادق لتقديم برنامج رياضي بأجر مليون جنيه في السنة.
وكنت بأقول يمكن دي دعاية مع علاء صادق لنفسه وبيزود في سعره بعد ما ساب قناة مودرن باستقالة على الهوا وبشكل دراماتيكي يخلي مفيش حد في الدنيا يعرض عليه أي عمل بعدها.

لكن الخبر طلع حقيقى ، واللي أكد الخبر هوه أسامة الشيخ رئيس اتحاد لإذاعة والتليفزيون وبرر التعاقد بإن البرنامج اللي هايقدمه علاء صادق هايجيب خمسة ملايين جنيه إعلانات. وبكده نقدر ندفع للمذيع المليون جنيه.

وبالذمة يا شيخ ده منطق ، ده كلام ولا ده أسلوب لإدارة التليفزيون ، برنامج لسه هايجيب خمسة ملايين جنيه ، يعني في علم الغيب. يعني الله أعلم وتيجي نقول نديله مليون جنيه سنوياً ، وبعدين نفترض البرنامج جاب خمسة ملايين فعلاً. يبقى السؤال هنا. مين اللي جابهم ، هل علاء صادق هوه بنفسه اللي اتفق مع المعلنين وجاب الإعلانات؟ في الحالة دي لو حصل كده يبقى حلال عليه ، فالراجل تعب واشتغل مندوب إعلانات وده يبقى حقه وان كانت ال 20% نسبة كبيرة قوي.
أما إذا كانت الإعلانات بتيجي لوحدها ، وده الأكيد لأن المعلن عارف ان الناس بتحب البرامج الرياضية وبتتفرج عليها في كل القنوات وبتقعد بالساعات تشوف التحليلات والندوات والكلام وتقديرات الحكام وإعادة الأهداف والفرص الضائعة والفاولات وضربات الجزاء وخناقات اللاعبين ، وناقص كمان ان البرامج الرياضية تنتقل لمنازل اللاعبين تقول لنا بياكلوا إيه ، وبيشربوا إيه..!

ومادام فلوس الإعلانات الرياضية جاية جاية. بعلاء جاية. وبغيره برضه جاية. يبقى كان المفروض التليفزيون يوفر فلوسه. وبلاش بعزقة. ويدفع مرتبات ومكافآت الناس اللي متأخرة عنده. ويطور شوية من الأجهزة والإمكانيات..!

وبعدين يعني إيه سياسة ان التليفزيون بيدفع بالهبل للغريب ويدفع بالقطارة للقريب ، ليه التليفزيون ما يطلعش” الشباب اللي عنده على الشاشة ويديهم نفس الإمكانيات ونفس التشجيع ويخلي الناس تعرفهم. ويصنع منهم نجوم. وهايكونوا نجوم بملاليم قصاد اللي التليفزيون هايدفعه لعلاء ولغيره من اللي عرفوا السكة من بدري وانفتحت لهم طاقة ليلة القدر من زمان. ومادام شافوا مغارة على بابا وخدوا منها الدهب والياقوت والمرجان يبقى يقولوا أحمدك يارب ويفتحوا الباب لغيرهم ، ماهي أصلها كيكة وكله لازم ياكل منها حتة ، أمال إيه ، هو فيه أكبر من كيكة الكورة. كله بياكل ملبن من وراها ، ده حتى الجمهور كمان بقى بيقبض ، وفيه مشجعين ليهم رواتب شهرية من الأندية ومن اللاعبين علشان يهتفوا ليهم حتى ولو انغلبوا..!

وإذا كان أسامة الشيخ الرئيس الجديد للإذاعة والتليفزيون هايبدأ مهام منصبه الجديد بتبرير الخطأ. وعدم الاهتمام بأبناء التليفزيون اللي أصابهم الصدأ وطلعت روحهم من تجاهل المسئولين فأنا واحد من الذين يعتقدون إنه مفيش فايدة ، ومفيش فايدة ليه ، أقو لكم ، لأن مفيش خطة واضحة للتليفزيون ، مفيش أهداف ، مفيش استراتيجيات ، فيه محسوبيات ، وفيه ناس أهل ثقة وأهل محبة وأهل قعدة حلوة وكلمة أحلي ، والناس دي هي اللي هاتخلي التليفزيون دايماً مجرد جهاز كبير منفوخ وفيه آلاف العاملين ، وبعد كده كل الآلاف دي يخلوها مجرد كومبارس ويجيبوا ناس من بره ، وييجي الشيخ يقولك أصل الراجل اللي إحنا جبناه ده هايجيب فلوس ، ياشيخ نقطنا بسكاتك أحسن ، فلوس إيه ، لو كل اللي انتم جبتوهم قبل كده جابوا فلوس بالشكل اللي بتقول عليه. كان التليفزيون يصرف على مصر ويسدد ديونها ، ويفتح كمان قناة خاصة لتقديم المساعدات للملايين من الغلابة اللي المليون جنيه اللي هاياخدها علاء لوحده ، تأكلهم سنة..!

** ملحوظة أخيرة:
الدكتور حاتم الجبلي وزير الصحة هو شخصية عام 2009 بلا منازع ، فهو أول وزير حذرنا من مقابر جماعية بسبب أنفلونزا الخنازير. فالراجل كان واقعياً وعارف إمكانيات وزارته كويس قوي..!

فيديو استقالة علاء صادق على الهواء من مودرن سبورت

اخبار ومواضيع ذات صلة:

2 comments
  1. نهال الشاذلي 13/11/2009 02:05 -

    والله ياريت يقعد في بتهم علاء صادق دا ياعني انسان تافه وكلامه تافه ملوش لازمه وبيحب يعمل شوشره والسلام وشو لي نفسه

أضف تعليقاً